“Shtyllat e Tokës” rrëfen historinë e Filipit, kryemurg i Kingsbrixhit, i cili merr përsipër të ndërtojë katedralen gotike më të madhe që ka njohur bota… historinë e Tomit, muratorit që bëhet arkitekti i tij, një njeri i ndarë më dysh në shpirtin e vet… atë të zonjës Aliena, që nuk mund të shpëtojë nga një turp i fshehtë… dhe historinë e luftës ndërmjet të mirës dhe të keqes, që do ta kthejë kishën kundër shtetit dhe vëllanë kundër vëllait.

Një rrëfenjë epike magjepsëse e ambicies, anarkisë dhe pushtetit absolut, e vendosur në sfondin e gjerë mesjetar të Anglisë së shekullit të dymbëdhjetë – kjo është kryevepra historike e Ken Follett-it.

Me këtë libër, Follett rrezikon gjithçka dhe del një fitues i padiskutueshëm… Një roman historik që të mbërthen gjatë leximit, me atmosferë autentike dhe tipizime të paharrueshme. Duke filluar me një mister që hedh hijen e vet, rrëfenja është një valëzim i tensionit, pasigurisë, veprimit me ritëm të patëmetë, intrigës, dhunës, lakmisë, trimërisë, përkushtimit, hakmarrjes e dashurisë. Një roman që të zbavit, të mëson dhe të kënaq në një shkallë të madhe. – Publishers Weekly

Një vepër epike e jashtëzakonshme plot të papritura… një enigmë shastisëse që përfshin ekzekutimin e një njeriu të pafajshëm… ngritjen e një katedraleje madhështore… romancë… rivalitet dhe spektakël. Një kryevepër monumentale… një triumf i vërtetë nga një talent i madh. – ALA Booklist.

E pamatë dhe e shkëlqyer… kjo rrëfenjë mamuthore duket se prek të gjitha emocionet njerëzore – dashurinë dhe urrejtjen, besnikërinë dhe tradhtinë, shpresën dhe dëshpërimin. Shikojeni vetë. Ky është një roman në të cilin humbet vërtet. – Cosmopolitan