Në librin e tij dy-vëllimesh, Jeta e Fan S. Nolit. Prof. Nasho Jorgaqi i jep lexuesit të dhëna gati të panumërta, për të gjitha fazat e jetës së gjatë të Nolit, që nga lindja në Ibrik-Tepe, afër Stambollit, e deri te dita që mbylli sytë në Florida, USA. Punë kjo që mund të bëhej vetëm nga një shkrimtar, që e shihte përpilimin e biografisë së Nolit si një detyrë të lartë kombëtare dhe personale, madje, gati si një mision të shenjtë. Ai i jep lexuesit njohuri për ngjarjet e mëdha dhe kthesat vendimtare në jetën e tij, por edhe për ato nga më të voglat, vjelur nga jeta e përditshme e Nolit, deri dhe sa gota ujë pinte në mëngjes dhe llojin e çajit përdorte.